禽獸無「人性」？
當我哋問人有無人性，個前設係講緊美好嘅特質，包括同理心、慈悲、慷慨；同時亦假定咗呢啲特質係人類先有。相反，我哋都會鬧啲壞人做禽獸。
但講到同理心，有好多證據顯示呢個特質唔係人類獨有。即使世界汰弱留強，動物需要靠本能生存，作為「有情生命」（sentient beings），動物都有能力身同感受而去做出本能以外嘅行為。好似上月尾嘅新聞咁，印度班馬騮意識到個男人係威脅、被性侵嘅小朋友有危險之外，仲喺好短時間選擇咗冒住危險救個小朋友，攻擊個男人。曾經亦有人喺動物園影低咗紅毛猩猩救起跌咗落水嘅雀仔。不過其實唔止靈長類，其他動物都展現過同理心同利他精神⋯⋯
海洋嘅大愛利他主義者
Nan 係一位生物學家。有一日佢落咗海去影鯨魚，突然間有條座頭鯨向佢游埋嚟，係咁 push 佢。Nan 喺佢背脊、頭部同胸鰭附近碌嚟碌去，又被佢頂咗上水。整個過程維持咗超過十分鐘，Nan 又驚又一頭霧水，直到佢見到人生見過最大條、佢形容為貨車咁嘅鯊魚，佢先 get 到原來條座頭鯨係想保護佢；跟住條鯨魚仲護送佢上返船。事後 Nan 提及曾經有紀錄座頭鯨用胸鰭掩護海獅，阻止虎鯨食佢，但唔知原來座頭鯨對住人類都會做同樣嘅嘢。
小鼠亦能感同身受
十幾年前，外國已經有針對小型哺乳類動物嘅同理心研究。具同理心嘅動物能夠領會其他同類嘅情緒，畀自己設身處地感受，甚至抑壓本能反應，主動幫助其他個體⋯⋯
今次主角係兩隻互不相識嘅老鼠。研究員困左老鼠 Mic 喺個裝置度，裝置度門必須由箱入面另一隻自由嘅老鼠 Ray 幫佢打開。Ray 一開始有啲驚咁喺箱嘅邊緣兜圈，但都有主動探索個裝置，搵方法幫 Mic。當 Ray 成功開咗個裝置，佢好開心咁同 Mic 追逐咗十分鐘。而不論換咗幾多隻唔識嘅老鼠，Ray 都係好快手咁幫手開門。
之後研究員幾次嘗試放咗兩個裝置：一個裝咗點心，另一個困住 Mic。Ray 都係開晒兩個裝置，並且同 Mic 分享點心。（意外地）對於 Ray 嚟講，同類同點心原來一樣咁重要。另外，都有其他研究發現老鼠同人一樣，對於家人朋友產生嘅同理心，會來得比陌生老鼠多。
反思「人性」
每次睇到人類虐待動物嘅新聞都好難過。其實動物嘅感受同思考能力可能都比我哋想像嘅複雜得多。
我睇過一條片，有隻黑色狗狗喺屋企睇《侏羅紀公園》，見到戲入面隻速龍步步逼近兩個小朋友嘅時候，佢變得好緊張。黑色狗狗全程望實部電視，鏡頭影住隻速龍想攻擊，黑色狗狗都好似睇得明同想保護戲中兩個小朋友咁，向住隻速龍嚟吠：https://paradepets.com/pet-news/jurassic-dog-park
就連喺動物園嘅棕熊，都試過比人影到食食下嘢，喺泳池邊救咗隻溺水嘅烏鴉上嚟：
對比其他動物，我哋作為人類其實有更大嘅能力同條件，反思我哋對待其他動物嘅方式。不論係衣食住行用，我哋都可以思考下，盡量以同理心選擇更加善良嘅生活方式，減少對其他物種同地球嘅傷害。
Joyce@地球村公所
Comments